Qytetarët të kënaqur me procesin zgjedhor në Gjakovë, shpresa për ndryshim

Procesi i votimit në Shkollën “Yll Morina”, në Gjakovë po zhvillohet pa probleme. Kështu ka bërë të ditur drejtoresha e shkollës, Aida Stublla, e cila ka theksuar se deri në orën 09:00 kanë votuar rreth 231 qytetarë, ndërsa gjithsej janë 9 mijë e 136 votues të regjistruar në 10 vendvotime.

Ajo shtoi se për personat me nevoja të veçanta është angazhuar ekip i posaçëm që u mundëson votimin, ndërsa deri më tani nuk është evidentuar ndonjë rast që ka kërkuar asistencë brenda qendrës së votimit.

Qytetarët e intervistuar shprehen të kënaqur me mbarëvajtjen e procesit dhe shpresat për ndryshim.

Qytetari Skënder Xerxa ka thënë se gjatë votimit nuk ka hasur në parregullsi.

Ndërkohë, Ardian Pali, i cili jeton jashtë vendit, ka bërë të ditur se ka ardhur posaçërisht për të votuar.

Edhe qytetarja Ajne Rama ka theksuar rëndësinë e pjesëmarrjes në votim.

Sipas të dhënave nga Lista Votuese, numri i qytetarëve me të drejtë vote në vendvotime, në Republikën e Kosovës është 1,999,204 votues, ndërkaq numri i qytetarëve që janë regjistruar për të votuar jashtë Kosovës është 77,086 votues.

Procesi zgjedhor brenda vendit do të zhvillohet në 948 Qendra të Votimit, me gjithsej 2,614 vendvotime, prej të cilave 910 qendra me 2,557 vendvotime për votimin e rregullt dhe 38 qendra, nga një për çdo komunë, me 57 vendvotime për të mundësuar votimin me kusht.